WURSTMAX BILANZIERT

I kenn mi aus. – I kenn de Gwerkschaften, de Briada, de miserabligen. I war selbst jahrelang organisiert. – Fuchzehn Jahre Mitgliedschaft, mir ko ma nix vormachn. Obwohl, jetz bin i ins andere Lager übergwechselt. I bin ja jezta selber praktisch Unternehmer worn, mei eigener Herr sozusagen, weil im Grunde is a Gwerkschaft bloß a Übergangsform zum freien Unternehmertum, a Provisorium quasi. Weil, ma kann doch net a Lebn lang nur organisiert sei, also, meiner Meinung nach gibt’s nur zwoa Alternativen: Unternehmer oder Gwerkschaftsfunktionär. Des is dann praktisch a Unternehmer mit Beamtenstatus. – Ich für mein Teil, i bin a Unternehmer worn, und dadurch san de Gwerkschaftler meine natürlichen Feinde. Aber oans muaß ma dem Feind lassn: Gschäftsleut sans, de Gwerkschaften; wenn S’ an Kaufhof nehma, was de für an Ramsch verkaufn, des macht Eahna da Hertie nicht nach, und net amal da Neckermann. Oda nehma S’ de Neue Heimat, de greislichn Betonbunker da draußt, des Neuperlach – mechst net glaubn, dass Eahna da oana nausgeht und drin wohnt, aba de san doch drin wia de Fliagn. Da ham de Gwerkschaften an unternehmerischen Scharfsinn bewiesn, also de Neue Heimat und der Kaufhof, des san echte Alternativen zur freien Wirtschaft. Renditemäßig san de unschlagbar. Jetz müaßns natürlich für ihre Mitglieder höhere Löhne fordern. Damit de de Mietn da draußt überhaupts zahln kenna. Für mich is des ganze Neuperlach ein einziges Sozialspital. Da hams an guatn Griff doa. Raffinierte Hund sans scho, de ham a Gspür, wo wos geht und wo ned. Weil bei de Krankenhäuser, da mischen se se net ei. Wenn i Schefarzt waar, dad i aa net in d’ Gwerkschaft geh, und in de Krankenhäuser hams aa nix zum Suchn, des san kerngesunde Unternehmen, und dene Kranken ko’s ja Wurscht sei, was so a Pfleger verdient. Der einzige Nachteil is, dass ma fast nur no Ausländer als Pflegepersonal ham, Nonnen ausgenommen, aba de san ja im Aussterbm. Deitsch san praktisch nur no de Ärzte und de deitschn Patientn. – Auch in da Krise beweisn d’ Gwerkschaften a guate Nosn. – Kernforscher miaßn beschäftigt werdn bei dera Akademikerschwemme – mir könnan uns des gar net leistn, Tausende von so Kernforschern, de wo koa Atom macha kenna. Und wenn alle Akademiker bloß no Taxi fahrn, na ham mir koane Akademiker mehr, wo si mi’m Taxi fahrn lassn. Da zeigns aa an Gerechtigkeitssinn, aber des bringt natürlich  wieda  eine  gewisse Anonymität  mit sich, weil der einzelne is nix mehr wert, wenn er in der Masse auftritt. Als Einzelner im persönlichen Kontakt mit dem Chef erreicht man gewöhnlich mehr. Des san doch auch Menschen. I kann Eahna a Beispiel sagn aus meiner eigenen Angstelltenzeit: I bin zum Schef naufganga und habe eine Gehaltserhöhung gfordert. Als Erstes hat er mir a Zigarrn und an Platz angebotn – die beste Sorte, drei Mark mindestens. Nachert hat er sich siebn Minutn Zeit gnommen, er hat mir dann das sehr gut erklärt, sagt er: Mir dad er gern a Erhöhung gebn, jederzeit, an eahm liegt’s net, aber er sagt, d’ Gwerkschaftn – da hamma’s –, de fordern des für alle Mitglieder, un’ des werd z’ teier, und weil d’ Gwerkschaftn so lästig fordern, hab i praktisch koa Erhöhung bekommen. Aber wenn i net selber higanga waar, hätt i net amal a Zigarrn kriagt, nachert hätt’s wieda da Funktionär graucht. – Schaun S’, auch bei mir selber im Unternehmen – ich bin Inhaber von am gastronomischen Betrieb in Form einer Wurstbude. Einen Angestellten hab i, den Hassan, der is zu mir kemma und hat mehra wolln, nachert hab ich’s ihm in derselben Form erklärt, wie mir da Schef seinerzeit, allerdings is der Hassan Nichtraucher. Na is er unverschämt worn und hat mit da Gwerkschaft droht, na hab i ’n nausschmeißn müaßn. Weil an und für sich bin i a guatmütiga Mensch und habe für alle Probleme ein offenes Ohr, aber i lass mi doch net erpressn. – Und, sag ma amoi, aa gsellschaftlich is heitzutog d’ Mitgliedschaft eher a Nachteil, wenn oana net direkt in de oberen Ränge von da Gwerkschaft sitzt. Und da Beweis, dass’s aa ohne geht, siecht ma ja an de Zahnärzte – Notare – Gebrauchtwagenhändler – Makler –, glauben Sie, dass da oana organisiert is? De verdienen meines Erachtens nur deshalb so gut, weil s’ net in der Gwerkschaft san und weil s’ net wartn, dass eahna ois von obn her geregelt wird. – Irgendwann muaß a jeder Mensch amal selber in d’ Händ spuckn und die Sache in die Hand nehmen, weil die Gwerkschaften san meines Erachtens viel zu zahm. Jetza zum Beispiel: zehn Prozent  hams  gfordert,  nachert  san  net  amal sechs Prozent rauskemma, und weil de Flaschen net durchkomma san, hab i meine Würscht net um fuchzehn Prozent erhöhen kennan. Gott sei Dank is da Cörry naufganga, na hab i’s damit begründet – weil a Preisgestaltung muaß sei. Des is net so wichtig, was es kostet, sondern eine Begründung muaß her. Des sehng S’ aa bei de Ölmagneten, de wo des Geld praktisch direkt anziehn, de könnan des alles genau belegn und inserieren des sogar in der Zeitung, warum s’ mehra verdienan müaßn. – Aber oans muaß ma dene Gwerkschaftn lassn, organisieren, des könnans. De Ersten-Mai-Feiern, Respekt, Spitze – as Bier is schee kalt, da Leberkas ausgezeichnet, und de Redn wern Gott sei Dank aa imma kürza, und daran siecht ma scho, dass’s aa koane Probleme mehr gibt. I muaß scho sagn, des is sehr angenehm, also, i geh da heit no hin, obwohl i jetzt a Unternehmer bin und mi des Ganze gar nix mehr angeht, praktisch. – Also, über den Ersten Mai lass i nix kommen.